الأحد، 29 أبريل، 2007



تاج .. ولابد منه لأنه واضح إنه عادة عند المدونين منذ زمان سحيق ولكن لأني لسه نونو في التدوين جالي متأخر و" لازم أعمل تاج " تقولشي هابقا ملكة طب ما كفاية اني أميرة" .. وزي ما دبرت انا وشيرين "انتيختي" الخطة 2، 4، 8

عشان نقب على وش النت " حتما ولابد أجاوب..
وأرجو المعذرة لأني هغير أسلوبي في الموضوع ده بس واكتب بالعامية البلوجرية الشائعة في المدونات ..
إلى التاج الملوكي..


اسمك؟
أميرة

اسم الدلع المشهور في وسط اصحابك؟
مرمر

عمرك؟
24 سنة

مجالك او مجال دراستك ؟
الإعلام والصحافة

الصفات اللي خدتيها من ماما؟
التدبير

الصفات اللي خدتها من بابا؟
الهدوء في حل المشاكل

هل كنتي شاطرة في المدرسة؟
ايوة .. شطورة خالص

اسم مدونتك؟
على الطريق

لماذا اخترته..وماهي نيتك من وراء اختياره؟
لأنه يختصر معنى الأشياء التي نقابلها في طريقنا بالحياة ، ونيتي " بتسألوني عن النية كمان؟" اني أعبر من خلاله عن حاجات بتحصل لي وللناس غيري

هل فكرت في إغلاق مدونتك؟..والسبب؟

كتييييييييييير .. إحساس بالفشل

لماذا دخلت عالم التدوين من الاساس؟
بسبب رغبة شديدة في التعبير عن الذات وكشف وجه آخر عني لا يعرفه الناس "اوعوا تتخضوا عوووووووووو"

وكمان عشان جوايا حاجات كتير نفسي اقولها للناس

احلى جمله قيلت لك فى وصف مدونتك؟
أتمني لكي التوفيق والنجاح في تجولك بين غابة الكلمات

التعليقات بالنسبه لك ..اهميتها؟
احساس بأنه هناك من يسمعني

احلى بوست كتبته ...ضع اللينك ..ثم اذكر لماذا؟
ملكة العفاف .. لأنه يجسد حالة حقيقية

انسان مستعدة تضحي بحياتك –ركزي فى كلمة حياتك- عشانه؟
حياتي ؟ هو العمر بعزقة.. وبعدين حياتي مش بتاعتي عشان اضحي بيها ..

اسم أول حب؟ واسم اخر حب؟
أول حب كان مامتي طبعا وآخر حب هيبقى زوجي اللي لسه معرفهوش

انسان كرهتيه لدرجة الجنون و تمنيتي لو تمسكين سكينة وتنقضي عليه وتغرزيها فى قلبه تقتله وتقفي تبصي لجثته وتشفي غليل قلبك؟
الكلب بتاع جورج بوش

ما هو:
اسم أجمل كتاب كتبه بشر قرأته ومحتفظ به حتى الان؟
الأدلة المادية على وجود الله لمحمد متولي الشعراوي الله يرحمه

شىء تحسي بالراحة النفسية عندما تنظر اليه؟
السماء والنيل وزياد ابن اختي

اجمل مدينة زرتيها داخل مصر؟
بورسعيد

شخصية كارتونية بتحبيها؟
مازينجر "بتاع زمان ده" وتوم آند جيري

صفي ما يأتى:
شعورك لما بتسمع كلمة مصر؟
شعور بين اللهفة والخوف والحب والعتاب

شعورك لما بتسمعي كلام عن اليهود
بافتكر غدرهم لسيدنا موسى

هل أنتي راضية عن مدونتك شكلاً وموضوعاً؟
يعني مش راضية قوي

هل تسببت المدونات بتغيير إيجابى لأفكارك؟
نعم .. كشفت لي دنيا جديدة وأشخاص مختلفة وأسلوب مختلف ومبتكر في الكتابة والتواصل

هل تكتفين بفتح صفحات من يعقبون بردود فى مدونتك أم تسعين لاكتشاف المزيد؟
التانية

هل تخافين من بعض المدونات السياسية وتتحاشياها؟ هل صدمك اعتقال بعض المدونين؟


لأ .. لكن ما بعملش كومنت عندهم

ما الاغنية التى تحبين وضع اللينك الخاص بها فى مدونتك؟
خلقتني . . وهي أجمل أغنية دينية لحمادة هلال


12 التعليقات:

حامد يقول...

إن كان كل ما أجبت به حقا .. فأنت عمله نادره .. وان كان العكس.. فأنت واحده من ملايين .. متشابهين .. وانت ابنه مجتمع وثقافه وقوانين سبقت ميلادنا..
..........................
مدونتك لطيفه سعدت بتصفحها

غير معرف يقول...

يعني ياربي قلت شيرين نسيتني لانها عشرة سنة ولسة متمرش فيها ،أما اميرة الي بقالي معاها تسعة سنوات وسنتم قريبا العشر سنوات اعمل فيها ايه لما اتسالت مين احب شخص الى قلبك برضه نسيتني اعمل ايه واقول ايه غير حسبي الله ونعم الوكيل فيك يابوش ياللي ضيعت الحب من قلوبنا "بيبو "

شيرين يقول...

أميرة حبي أنا.. أجوبتك على التاج بها ليونة ورشاقة مش على حد .. وكان نفسي اكون اول المعلقين عندك بس تتعوض في تاج تاني ان شاء الله .. اتمنى لكي التوفيق .. وطبعا احنا على اتفاقنا هنقب على وش النت مع بعض مش لوحدك مش عايزة ندالة لحسن اغرقك.. تحياتي

•«ρяoιd»•™ يقول...

اجاباتك حلوه قوي

الحمد لله انل لسه علي قيد الحياه بعد التاج ده

ربنا معاكي

تحياتي

أميرة يقول...

حامد
_____

حاولت تحري الصدق والحقيقة قدر المستطاع في كل إجاباتي .. وسواء كنت نادرة او مثل الملايين فالمهم ان ابقا انسان ..

تشرفت بمرورك على "على الطريق ".. وأسجل إعجابي الشديد بمدونتك وفكرك المتميز


صديقتي العزيزة بيبو
___________________
انتي اكبر من اني اذكرك في مدونة لا يقرأها إلا بضعة أشخاص .. سد يا ماما ما تعيطيش


صديقتي الأنتيخ شيرين
_________________

قبي انتي على وش النت .. انا هاستناكي على الشط علشان انشفلك هدومك من البلوجرات اللي غرقتي فيها

أميرة يقول...

برويد
______

العين صابتني ورب العرش نجاني .. ما هو ياما مرت عليك يا برويد تاجات وكنت بطل قدامها ..

اتشرفت بزيارتك ويا ريت تكررها

هالة الدسوقي يقول...

ما شاء الله يا أوميرة ، بجد جميل إنك تسألي نفسك وتردي عليها، فالكثير منا لا يجيد استجواب النفس، وأنتي ممن تجيدين.
ربنا يوفقك

أُكتب بالرصاص يقول...

السلام عليكم

انا كنت بأقرأ لا بيا ولا علي
وكنت مستمتع قوي..
لاحد ما لاقيت اسمي مكتوب

متشكر جدا على الثقة دي،

ودي فعلا مش مجاملة ..
مدونتك حلوة قوي،
ولك مستقبل في مجال الاعلام والكتابة

ربنا يفنع بك ، وبموهبتك


تقبلي تحياتي

أميرة يقول...

هالة الدسوقي
_____________
ربنا يكرمك ويعزك .. اتنمنى أن أجيد التواصل مع نفسي وألا أفقد صداقة إنسانة مثلك .. نورتيني

أكتب بالرصاص
_____________

مبروك عليا أول تعليق ليك عندي .. متشكرة على تشجيعك ويا رب تنورني دايما .. وشكرا على الدعوات الحلوة دي

سعيد يقول...

أول مرة أقرا لك لأنى لسه على اول سلم التدوين ولكن لن تكون الآخيرة ؛ذلك لان مدونتك دمها خفيف مثل اى شئ مصرى ومستساغه لاى قارئ
سعيد جمعه الجيزة

أميرة يقول...

سعيد
*****
مرحبا بك في مدونتي المتواضعة .. وأتمنى لك حياة تدوينية مثمرة

AHMED يقول...

السلام عليكم ورحمة الله وبركاته
مدونه جميله
نسأل الله أن يديم عليكى الخير والبركاته
والأعمال الصالحه دوما
ونسأله الجنه لكى ولنا ولكل المسلمين

كما أنتهز تلك الفرصه لأدعوك لمشروع أطلقنا عليه مشروع العمر
مشروع حفظ القرآن الكريم
حفظ كتاب الله
للمشاركة معنا فيه
حتى ولو بدعوه من تعرفهم
أو مساعدتنا بنشره
أو تسجيل أسمك والمشاركه بالحفظ معنا
http://www.eltahady.com/vb/showthread.php?t=10242
جزاك الله خير